[Bebet Lanwit] « Alé war Roland! » ou rakont nou Garros.

Dabor, ki sann-la Roland Garros ? Se enn gran aviater ki finn ne Larenion ek sa lane-la pe fet 100 an so disparision. Nou bizin rapel ki se limem ki an premie travers lamer Mediterane an avion ek ousi invanter bann tir atraver elis pandan premie lager mondial !

Natirelman, Larenion bien fier ki enn personalite koumsa ena so lonbri antere kot li e ena mem enn stati Roland Garros ki pe get an direksion lamer dan St-Denis. Se apartir sa stati-la ki lexpresion « Alé war Roland ! » sorti… Get bien sa foto-la. Roland Garros ena enn lame dan pos…pena tire sa ! Donk, kan kikenn demann ou pey enn labwason, ou enn manze ou zis demann ou enn ti kas, si ou pa anvi done, ou reponn :

Alé war Roland ! Enn sou ou pa pou gagne, lame pou rest dan pos…

Ala enn zoli fason fer zanfan konekte ek listwar bann personaz ki finn mark listwar zot pei. Se koumsa ki Jean-Louis Castanier ek Jean-Bernard Grondin koumans zot bann latelie dan bann lekol. Sa semenn-la, sa de manb lasosiasion A-3-A ti dan Moris pou fer dekouver a bann zelev lavi Roland Garros. Atraver enn zwe ki A-3-A finn invante ek enn film, bann zelev 3 lekol Franse finn gagn lokazion konn inpe plis Roland Garros.

Biensir, nou ti pou kontan ki enn inisiativ koumsa kapav al dan enn maximum lekol dan Moris. E esperon ki bann lotorite konserne pa dir : Alé war Roland!