Menu


Paul Lismore

[Paul Lismore] Kifer la Cour supreme p azir kouma ene enemi nou demokrasi?


Rédigé par Paul Lismore le Jeudi 8 Octobre 2020


" The bedrock of our democracy is the rule of law and that means we have to have an independent judiciary, judges who can make decisions independent of the political winds that are blowing."---Caroline Kennedy.



Ki nou truver dan nou soi dizan etat de droit? Ene zidiciare ki paret de plus en plus kom godam la cuisine, et ki p pran ene letan absoluman criminel pou ekut ban petitions lor dernier elections zeneral.

Tou demokrasi ena kom baz ene system kot 'free and fair' elections fer dapre ene schedule bien preci. San 'free and fair' elections, pena la demokrasi parski sa v dire ki ban voleurs in kokin elections et alor p roule pays pou zot prop lavantaz. Sel facon pou enpesse sa, c ene system zidiciare ki pou azir bien vite kan ena boukou petitions ki conteste validite sa ban elections la. 

Ki nou truver dan Lil Moriste? Petitions elektoral penkor meme ekuter preske 1 an depi ki la cour supreme in recevoir zot! Ki la cour Supreme p fer aprer tou sa letan la et p enkor fer? P ekut "Counter Petitions" ban dimoune lor ki ena gro doutes lor zot elections! 

Et tou sa ban ki ena gro doutes lor zot elections, ki zot sel arguman? " Bizin ekut petition Roshi Bhadain avan ki ekut tou lezot petitions!" In other words, a nou ekut petitions sa boug ki ti sorti HUITIEME dan nimero 20 avek 4000 votes deriere seki sorti 3eme, avan ki nou ekut ban ki in sorti 4 eme et in perdi par tigit votes! KIFER???

Kifer la cour supreme p meme ekut ban counter petitions en fesse kumsa? Kifer Roshi Bhadain so judicial review ena plis linportans ki petitions ban candidats ki in perdi par tigit et kot boukou dimounes dire ti ena boukou tricks?

Pli inportan enkor, KIFER TOU DEPITE/MINISTRES GOUVERNMAN KI ENA GRO DOUTE LOR ZOT 'VICTOIRES' P PRAN ROSHI BHADAIN SO JUDICIAL REVIEW KOM ZOT BOUEE DE SAUVETAGE? Zot pa truv narien drole ladan, ki ena ene kiksoz ki pa tourne ron dan sa argiman la? Mo pa p dire ki Roshi in fer sa par expre, mai mo pa blier ki li oussi ti ene mam la cuisine, et aster ban mam la cuisine p trap so graines pou sov zot la vie depite/ ministre....

La Cour Supreme in gagne nouvo batiman bien moderne et ki in coute Rs 1 milliard roupi, mai system la res parey. Narien pa in sanzer, tou case pran ene eternite pou conpleter, apart ki case si in al kokin leksi dan Marionette so la cour...

En 1959, ti pran La cour supreme zis DIX MOIS pou decider ki ene election pa ti bon, et donne lordre pou refer sa election la, et Gaetan Duval rant dan parlman. Election Ashok Jugnauth en 2005 ti cancel par la cour supreme et Privy Council, et en 2008, Pravind Jugnauth re vine o parlman parski la cour ti donne lordre fer nouvo elections. Rapel bien: Ashok Jugnauth ti perdi so siez akoz promesse ene cimetiere! Aster kan nou guet tou sa malpropte dan dernier election, la cour supreme prefere diskitte counter petitions en place ki ekut argimans lor vrai petitions? Eoula! Sa meme Demokrasi la? Sa meme nou etat de droit kot zidiciare azir kouma ene force independante et neutre kont ninport ki abus ene gouvernman? Res rever, kamarade!

Preske 1 an in passer, et ziska ler, la cour Supreme pa enkor tousse petitions ki in avoy li. O kontrer zidiciare p nek ekut argimans la cuisine ki tou, san exception tourne lor ene sel zafer: " A nou ekut petition Roshi Bhadain avan!"

Et Lepep Kouyon res trankil? Nou ban gran zourlanus dan nou "free and independent" press res trankil? Kumsa nou ban ziz et nou la cour de zistis in vine ban sacred cows ki personne pa rode koz la facon degoutan zot p deal avek sa petitions elektoral la?
Ki kalite demokrasi sa?


Nouveau commentaire :

Règles communautaires

Nous rappelons qu’aucun commentaire profane, raciste, sexiste, homophobe, obscène, relatif à l’intolérance religieuse, à la haine ou comportant des propos incendiaires ne sera toléré. Le droit à la liberté d’expression est important, mais il doit être exercé dans les limites légales de la discussion. Tout commentaire qui ne respecte pas ces critères sera supprimé sans préavis.