[Bebet Lanwit] “Transpozision” (Gaël Froget) ou Pozision an Trans: Kot langaz Kreol tras so sime!

Sorti depi enn leta a enn lot, dan enn mouvman sakade, dan enn mouvman ki dimounn pa atann.

Ala santiman ki mo finn gagne apre vizit expozision Gaël Froget, ‘Transpozision”.

Seki finn plis mark mwa se manier ki nou lang maternel fofil ant bann kouler, pou dir enn realite ki nou souvan anvi kasiet.

Personn pa kapav met enn kote lefet ki se dan nou lang maternel ki nou finn aprann reprezant lemond.

Maryaz ant bann mo ek bann kouler dan enn sel lespas amenn sak tablo dan enn liniver kot tou kiksoz posib.

Bann text finn ekrir par Radjiv Dave Ramdenee e sansibilite so lekritir marye dan enn manier inik avek pinso Gaël Froget.

Pou rapel, “Transpozision” se ziska le 27 Septam apartir 10h gramatin dan Third Dot, Port-Louis.